Amor di Cantica | Pagina Oficial di e Pelicula

Aruba su prome musical film “Amor di Cantica”

Fundacion AVI conhunto cu SWBE Media Productions lo realisa Aruba su prome musical film. Recientemente AVI & SWBE a participa na AIFF cu dos produccion local; 10 Ave Maria y Muhe Frida. AVI & SWBE tin como meta pa sigui engrandece Aruba su cultura audiovisual. E siguiente proyecto Amor di Cantica ta un produccion mas cu ta forma parti di e obhetivo di AVI & SWBE na unda cu hobennan di Aruba lo haya e oportunidad pa participa den e produccion cinematografico aki. Amor di Cantica ta teatro di amor basa riba e mundo contemporaneo, miho describi como Romeo y Julieta di nos tempo.

Cu e proyecto aki AVI & SWBE kier brinda na e hobennan participante e posibilidad pa desaroya nan talento y e espacio pa por expresa nan mes. E hobennan cu forma parti di e proyecto aki lo haya dos luna di preparacion den actuacion, canto y baile. Amor di Cantica ta promove e arte di canta, baila y actua. Pa e publico e pelicula ta bay ta un experiencia espectacular.

Pa AVI & SWBE ta importante pa hobennan haya e posibilidad pa explora y amplia nan conocemento riba e tereno di produccion audiovisual, AVI & SWBE ta ofrece na e hobennan e oportunidad pa participa den ‘behind the scene’ di e proyecto aki. Eherciendo funcionnan e.o. di Art Director, Production Manager y Script Supervisor.

Amor di Cantica ta un micro budget film, e ta un proyecto cu AVI & SWBE ta realisa pa nos comunidad y hobennan. Actualmente e proyecto a logra haya steun financiero for di UNOCA & VNO. Pero pa por realisa e proyecto adecuadamente nos ta buscando mas support, cualkier donacion lo ta altamente aprecia.